Kelly

究竟成莊之後第一件要做嘅事係乜嘢？策劃第一個活動？諗定O Camp 可以有咩玩？錯喇，係要去準備Pro P宣傳Soleil俾更多嘅人認識。

Pro P 準備嘅時間好少，但要準備嘅嘢好多。仲記得啱啱成莊之後，就要即刻開始寫Pro P Plan同埋 Year Plan。一開始我以為所有Plan都有特定嘅內容同格式可以參考，但原來所有嘢都係由零開始，所有莊員要一齊落手落腳諗掂佢。本來以為做好Pro P Plan，打好晒所有細節，Pro P 嗰段時間只係需要跟住嚟做，應該唔會係一件困難嘅事，但係現實中往往充滿變數，最後個Plan裏面有好多內容都因為疫情加劇而改變。為咗令Online Pro P 可以吸引到更多人嚟睇，我哋成支莊前後改咗裏面嘅內容好多次，搞咗好多One Day Takeover 同整咗唔同嘅challenge片，務求可以帶到歡樂俾大家。雖然成個過程好辛苦，但係見到有人喺IG Posts同Stories 俾Like同Comment，就會覺得一切嘅努力都係值得嘅。

大家辛苦籌備咗成個月嘅Pro P雖然睇落好漫長，但其實好快就完咗。可以同一班莊員合作，一齊努力面對所有困難，盡力去做到最好，應該係我喺當中最大嘅得着。嚟緊一年莊期，我哋會繼續努力，搞更多有趣嘅活動，展示最好嘅一面俾大家睇。